Акафист Матушке Алипии

Акафист Матушке Алипии

Кондак 1

Избранной от многоликого полка святых новомучеников, во времена новые явившейся для утешения и вразумления людей заблудших, града Киева непрестанной заступнице, похвалы смиренные, яко имущей любовь неизреченную, дерзаем принести тебе, зовуще:

Радуйся, мати наша Алипие, любовь велию в сердце своем стяжавшая.

Икос 1

Ангели удивишася, како немощная жена образу отец древних во времена сия новая достойно подражала еси, сочетая в себе дары Духа Святаго, явленные для служения Церкви Христовой. Мы же, дивящеся благодати Божией, в тебе просиявшей, радостно вопием ти:

Радуйся, словом мудрости просвещенная;
Радуйся, слово знания показующая.
Радуйся, силою веры укрепленная;
Радуйся, даром исцелений прославленная.
Радуйся, чудотворице великая;
Радуйся, пророчице изрядная.
Радуйся, Христа в сердце свое вселившая;
Радуйся, в смирении житие свое проводившая.
Радуйся, постом плоть свою укротившая;
Радуйся, молитвою душу свою укреплявшая.
Радуйся, милостыню в правило себе вменившая;
Радуйся, любовию прегрешения немощных покрывавшая.

Радуйся, мати наша Алипие, любовь велию в сердце своем стяжавшая.

Кондак 2

Видящи пред собою образ Христа Бога нашего, потщалася еси всем житием Ему Единому последовати и Ему Единому послужити, восприявши слова апостола, яко «не имамы зде пребывающаго града». Темже вся земная ни во чтоже вменила еси и, Небесному Отечеству последуя, воспевала еси: Аллилуиа.

Икос 2

Разумом Божественным просвещаема, от юности сердце свое в престол Господа Бога уготовала еси. Не убоялася еси оставити отечество и род свой, терпя недостатки и оскорбления, странствуя от храма к храму, тишиною Божественною напитая и подражая всем святым, угодившим Богу, ихже весь мир не бе достоин, в пустынях скитающимся и пропастех земных. Мы же, суетнии, вопием:

Радуйся, Церкве Торжествующия прославление;
Радуйся, Церкве земныя предстательство и похвало.
Радуйся, благодати Божественныя тихое проявление;
Радуйся, людей немощных непрестанное удивление.
Радуйся, от юности Духа Святаго стяжавшая;
Радуйся, душу человеческую прозревавшая.
Радуйся, за смирение Господом Богом почтенная;
Радуйся, на подвиг юродства Им благословенная.
Радуйся, града Пензы чадо богоизбранное;
Радуйся, родителей благочестивых отрасль святая.
Радуйся, молитися за родителей своих заповедавшая;
Радуйся, молитвою родителей крест свой понесшая.
Радуйся, мати наша Алипие, любовь велию в сердце своем стяжавшая.

Кондак 3

Силою Вышняго чудодействующей, никтоже из притекающих к тебе, преподобная мати, неутешен отыде: недугующим являеши исцеление, скорбящим — материнское утешение, грешным же и отчаявшимся во спасении своем — исправление и скорое у Господа Бога прощение. К кому убо, аще не к тебе, притецем мы, в покаянии взывая Богу: Аллилуиа.

Икос 3

Имущи сердце, Духом Святым любовь Господню познавшее, в годину тяжкую и во время испытания Церкве Российския, егда призва Господь архипастырей и пастырей, монахов и мирских принести себе яко непорочное заколение, тогда и ты, преподобная мати, рекла еси со всем собором святых новомучеников, яко ни скорбь, ни теснота, ни смерть от любве Божия разлучити тебе не возмогоша. Темже чаем недостойными похвалами нашими ублажити тя:

Радуйся, верное чадо Церкви Христовы;
Радуйся, Христа ради в темницу заточенная.
Радуйся, подвиг новомучеников возлюбившая;
Радуйся, чести христианския не посрамившая.
Радуйся, в темнице кротко молившаяся;
Радуйся, гонителям ответа не дававшая.
Радуйся, злобу добром побеждавшая;
Радуйся, терпением врага посрамившая.
Радуйся, к лику новомучеников сопричтенная;
Радуйся, от страданий твоих чудесно спасенная.
Радуйся, в час испытания нам помогающая;
Радуйся, в отчаянии утешение дарующая.
Радуйся, мати наша Алипие, любовь велию в сердце своем стяжавшая.

Кондак 4

Буря злобы врага рода человеческаго не поколеба тя, преподобная мати наша Алипие, во все житие твое посрамити тя хотящаго. Чрез вся искушения неврежденно прешла еси. Ныне же тихое пристанище и райское наслаждение обрела еси, по слову Господню: «Побеждающему дам вкушать от древа жизни». Темже руководи и духовныя чада твоя, научая нас едиными усты и единем сердцем пети Богу: Аллилуиа.

Икос 4

Слышавше вси людие о велицей любви твоей к страждущим, притекают к тебе, и умолкает уныние, и отчаяние исчезает; грешницы же в скорбех сердечных обретают утешение, благодаряще Бога о таковей молитвеннице. Дивны дела Твоя, Господи! Темже, веселящеся, зовем:

Радуйся, скорбящаго утешение;
Радуйся, заблудшаго печальнице.
Радуйся, страждущаго сострастие;
Радуйся, алчущаго насыщение.
Радуйся, всех в сердце свое вместившая;
Радуйся, любовию ко всем пламенеющая.
Радуйся, молитвеннице теплейшая;
Радуйся, веры православныя ревнительнице.
Радуйся, сердце милующее стяжавшая;
Радуйся, мати наша многоскорбная.
Радуйся, всеми осужденнаго милующая;
Радуйся, предстательнице за ны пред Богом.
Радуйся, мати наша Алипие, любовь велию в сердце своем стяжавшая.

Кондак 5

Чудо преславное сотвори с тобою Господь, преподобная мати наша Алипие, егда в темнице ти сущей явися святый апостол Петр и изведе тя от уз, милосердствуя о тебе, яко и сам некогда ангелом Господним от темницы избавлен бысть. Сего ради во все житие твое святаго апостола Петра усердно почитала еси, благодарно вопия Богу: Аллилуиа.

Икос 5

Видевши на себе милосердие Господне, восприяла еси избавление от темницы яко знамение, да отныне все житие твое милосердием ознаменуеши и людем немощным послужиши. Сего ради смиренныя мольбы Богу приносила еси о воскресении умершия отроковицы и об избавлении от глада бедствующих, исцеливши скот их. Несть болезни, о нейже сердце твое не поболезнова, ни скорби, о нейже не поскорбе. Сего ради от всея души нашея ублажаем тя:

Радуйся, яко чудо воскресения показала еси;
Радуйся, яко в сем преподобному Сергию уподобилася еси.
Радуйся, яко раны молитвами твоими исцелеваху;
Радуйся, яко опухоли благословением твоим исчезаху.
Радуйся, врачевание благодатное сокрывавшая;
Радуйся, славы человеческия избегавшая.
Радуйся, пищею исцеления содевавшая;
Радуйся, ризами твоими и ныне исцеления подающая.
Радуйся, не дара сего взыскати, но Богу угодити тщавшаяся;
Радуйся, дар сей от Господа Бога приявшая.
Радуйся, многих дивных чудес совершительнице;
Радуйся, яко молитвы твоя по любви твоей к людем слышит Господь.

Радуйся, мати наша Алипие, любовь велию в сердце своем стяжавшая.

Кондак 6

Словес евангельских, еже возлюбити ближняго, яко самаго себе, и еже: «Больше сея любве никтоже имать, да кто душу свою положит за други своя», — верною исполнительницею показалася еси, преподобная мати, денно и нощно труждаяся на благо ближних, сокрушенно моляся Господу Богу о помощи заблудшим чадом своим, питая и исцеляя, наставляя и утешая. Темже благодарными усты взываем Богу: Аллилуиа.

Икос 6

Возсия стране нашей благотворный свет великих добродетелей твоих: яко граду Петербургу — блаженная Ксения, яко граду Москве — блаженная Матрона, тако и град наш Киев не остави Господь, явив нам подражательницу подвигов преподобных отец Печерских. Возлюбила бо еси, святая, Лавру Печерскую, идеже великия подвиги совершила еси. Мы же, вернии, радуяся о сем, взываем:

Радуйся, яко образ юродства до конца жития своего прияла еси;
Радуйся, яко блаженней Ксении Петербургстей подражала еси.
Радуйся, яко приходящаго чадом своим именовала еси;
Радуйся, яко во все житие свое на ложе не возлегла еси.
Радуйся, веригами тяжкими плоть свою отягчившая;
Радуйся, ключем на выи своей чадо новое знаменовавшая.
Радуйся, яко ключем тем душу человечу отверзала еси;
Радуйся, любовь ко Господу Богу в сердцах возжигавшая.
Радуйся, яко благодатию Божиею души грешныя ко врачевству покаяния приводила еси;
Радуйся, яко со ангелы беседовала еси.
Радуйся, пищею малою питавшаяся;
Радуйся, яко в среду и пяток пищи не вкушала еси.

Радуйся, мати наша Алипие, любовь велию в сердце своем стяжавшая.

Кондак 7

Хотящи волю Господню творити, предала еси себе в послушание старцем Крониду и Дамиану, волю свою отсекающи; темже в дупло древесное вселилася еси и тамо себе ко благому подвигу устрояла еси. Мы же, дивящеся таковому подвигу, паче разумения человеческаго сущему, хвалебно поем Богу: Аллилуиа.

Икос 7

Новую тя во столпницех ревнительницу показа Господь в Лавре Печерстей, идеже, телом страдая и болезнуя, Духом Святым исполнялася еси; постом и холодом плоть свою смиряя, духом же возносилася еси к собору преподобных отец Печерских и, помощию их укрепляема, высоты духовныя достигла еси. Поминающе таковую ревность твою, вопием:

Радуйся, в ангельский чин старцем Кронидом облеченная;
Радуйся, плотское мудрование отложившая.
Радуйся, молитвою искушения побеждавшая;
Радуйся, терпением волю свою отсекавшая.
Радуйся, нощию к Богу молившаяся;
Радуйся, молитву непрестанную возлюбившая.
Радуйся, яко прах в человецех себе вменившая;
Радуйся, во смирении преуспевшая.
Радуйся, в тесноте древесней житие свое проводившая;
Радуйся, во стоянии присно пребывавшая.
Радуйся, никогдаже телу своему успокоения не дававшая;
Радуйся, истиннаго самоотвержения совершенный образе.

Радуйся, мати наша Алипие, любовь велию в сердце своем стяжавшая.

Кондак 8

Странное и преславное чудо является ныне пред очима всех верных: Долготерпеливый и Многомилостивый Господь не прогневася на ны до конца за беззакония наша, но, помянув милость Свою, якоже во времена древния, тако и ныне дарова нам тебе, досточудная мати, заступницу и утешительницу, с нами пожившую и немощи наша ведающую. Темже исполняются сердца наша надежды и веселия, благодарно вопиющия Богу: Аллилуиа.

Икос 8

Вся любовию к Богу пламенеющи, преподобная мати Алипие, егда новое гонение воздвижеся на Церковь Христову, пребыла еси на месте, идеже служение отец Голосеевских продолжила еси, светя миру светом веры и благочестия. Людие мнози стекахуся к тебе, да приимут благословение твое. Ты же, аки в пустыни, пребывала еси тамо до скончания жития твоего и ныне всем с верою приходящим неоскудную помощь подаеши, зовущим:

Радуйся, овраги и холмы местом молитвы избравшая;
Радуйся, тамо с духи нечистыми подвизавшаяся.
Радуйся, пустыннаго безмолвия любительнице;
Радуйся, места святаго хранительнице.
Радуйся, источник целебный у Бога испросившая;
Радуйся, воду его молитвою освятившая.
Радуйся, водою сею исцеления подающая;
Радуйся, во спасение неустанно подвизавшаяся.
Радуйся, разрушенныя святыни молитвою охраняющая;
Радуйся, Ангела Престола чтити наставляющая.
Радуйся, пустыни Голосеевския великая похвало;
Радуйся, обители сея воссиявшая славо.
Радуйся, мати наша Алипие, любовь велию в сердце своем стяжавшая.

Кондак 9

Всем приходившим к тебе, преподобная мати, молитв и благословения ради, различными мирскими делы, напастьми и скорбьми отягченным и утесненным, тако утешение подавала еси, якоже родитель чада своя во обстоянии скорбей и болезней утешает, отраду им своим попечением подавая и матернею любовию тяжесть печалей облегчая. Тобою бо и невернии, и безбожнии к Богу притекаху. Смиренно молим тя: и нам, во дни напастей, искушений, недоумений и сомнений к тебе притекающим, возглаголи слово утешения, наставления и ободрения, да, облагодетельствованнии тобою, благодарно поем Богу: Аллилуиа.

Икос 9

Витий человеческих уста не возмогут описати величие тайны Божией, како прошедшая и будущая, яко настоящая, провидела еси; мысли человеческия, аки в книзе написанныя, читала еси; от лукаваго стужаемым исцеление скорое подавала еси; молитвою твоею страждущии облегчение от болезней получаху; гласу же твоему и стихии земныя повиновахуся. Сего ради, недоумением объяти бывше, глаголем:

Радуйся, двухнедельным постом дождь земли испросившая;
Радуйся, дождю не быти повелевавшая.
Радуйся, беду Чернобыльскую прозорливо предрекшая;
Радуйся, яко молитвами твоими от беды сея Господь ослабу подаде.
Радуйся, страданиям земли нашей и тварей бессловесных вельми сострадавшая;
Радуйся, о страданиях сих на Страстней седмице предостерегавшая.
Радуйся, учинение раскола прозорливо показавшая;
Радуйся, яко нечестивых обличала еси.
Радуйся, яко введение новаго стиля образно осудила еси;
Радуйся, яко юродством и образным словом тайны Божии являла еси.
Радуйся, яко безумием мнимым безумие мира открывала еси;
Радуйся, слуго Господня верная, благая и истинная.
Радуйся, мати наша Алипие, любовь велию в сердце своем стяжавшая.

Кондак 10

Спасительнаго подвига плодами исполнена, наипаче же во смирение облечена была еси, преподобная мати Алипие, чуждаяся всякаго превозношения и служению людем всю себе предавшая. Дивно бе видети тя в ветсей и многошвенней одежде ходящую, светлыми очами всех — богатых и убогих, начальствующих и простых — равно с любовию приемлющую и коемуждо слово на пользу душевную изрекающую. Темже ныне велиим гласом от всея души нашея вопием Богу: Аллилуиа.

Икос 10

Стена необоримая и заступление граду Киеву явилася еси, всеблагая мати Алипие. Не тщетну сотвори молитву нашу, да живем под благословением твоим. Яко не имамы иныя толико милостивыя молитвенницы о нас ко Господу Богу. Мы убо, чада твоя, молим тя: буди нам мати сострадательная; аще и праведным судом Божиим наказания достойни явимся, веруем бо, яко можеши умолити Господа о нас, да от избытка сердца радостно глаголем:

Радуйся, любящим и чтущим тя ходатаице спасения;
Радуйся, душам и телесем здравие подающая.
Радуйся, Евангелия Христова смиренная проповеднице;
Радуйся, апостольских преданий ревностная хранительнице.
Радуйся, яко обличение грешником кротко подавала еси;
Радуйся, яко непричастна лицеприятию была еси.
Радуйся, яко в келии своей явления святых удостоилася еси;
Радуйся, яко за любовь к людем напасти от врага претерпевала еси.
Радуйся, подвига своего николиже не оставлявшая;
Радуйся, храму Демиевскому усердно прилежавшая.
Радуйся, яко в храме сем икону святых апостолов Петра и Павла благоговейно почитала еси;
Радуйся, храм сей молитвами своими соблюдавшая.
Радуйся, яко по слову твоему в храме сем прописана еси;
Радуйся, яко радость храму сему собою принесла еси.
Радуйся, мати наша Алипие, любовь велию в сердце своем стяжавшая.

Кондак 11

Пение всеумиленное Пресвятей Троице принесла еси при исходе твоем и, яко пшеница зрелая, рекла еси со апостолом: «Время моего отшествия наста. Подвигом добрым подвизахся, течение скончах, веру соблюдох». И ныне уготован тебе венец правды, егоже даде тебе Господь, Праведный Судия. Мы же, грешнии, радуемся прославлению твоему на небеси, вопиюще Богу: Аллилуиа.

Икос 11

Светозарным светильником была еси, Алипие всеславная, егоже не поставляют под спудом, но на свещнице, да светит всем. Тако просветися свет твой пред человеки, яко вси видехом добрая дела твоя и прославляем Отца нашего, Иже на небесех. Тебе же, любовию понуждаеми, зовем:

Радуйся, яко по кончине твоей с нами неразлучна пребываеши;
Радуйся, яко крестом чада твоя при кончине благословила еси.
Радуйся, яко благословение сие хранити поручила еси;
Радуйся, яко сирот не оставляти обещалася еси.
Радуйся, предстательнице ко Господу непостыдная;
Радуйся, ко Пресвятей Богородице молитвеннице неусыпная.
Радуйся, любве и сострадания явление обильное;
Радуйся, о душах наших благоприятное предстательство.
Радуйся, яко по имени твоему беспечальна пребываеши;
Радуйся, яко пожинаеши плоды вечнаго радования.
Радуйся, с ликом отец Печерских хвалу, честь и славу Богови приносящая;
Радуйся, яко воспеваеши песнь нову во Царствии Небеснем.
Радуйся, мати наша Алипие, любовь велию в сердце своем стяжавшая.

Кондак 12

Благодать от Бога восприяла еси наставляти нас на путь истины и не дати душам нашим погибнути; и ныне умоляеши Господа, да спасет нас, имиже весть судьбами, и сподобит в вечней жизни радостнаго свидания с тобою, да и мы молитвами твоими достигнем Царствия Царя царствующих и Ему благодарно вопием: Аллилуиа.

Икос 12

Поюще славную кончину твою и успение твое со святыми, провождаху тя духовнии чада твоя, сердца имуще многовоздыханна и многоскорбна. Но, памятующе словеса твоя, яко ты не умираеши, заповедь твою соблюдают и ныне, приходяще ко святым мощам твоим и вопиюще сердцем и усты:

Радуйся, от мощей твоих многая чудеса являющая;
Радуйся, новыя чада со всех концов собирающая.
Радуйся, благоухание дивное подающая;
Радуйся, свещи над мощами твоими чудесно возжигающая.
Радуйся, светом небесным место сие озаряющая;
Радуйся, яко чада новыя молитвы о скорбех своих сердечно тебе приносят.
Радуйся, яко образ твой слезы источает;
Радуйся, яко миро благоуханное от него истекает.
Радуйся, яко беснии мнози тамо исцеление приемлют;
Радуйся, яко помощь твоя скоро им подается.
Радуйся, из погибельныя пучины легко извлачающая;
Радуйся, яко сердца безбожных чудесы твоими светом веры озаряеши.
Радуйся, мати наша Алипие, любовь велию в сердце своем стяжавшая.

Кондак 13

(глаголется трижды)

О пречудная мати Алипие! Приими сия песнопения, в похвалу твою воспеваемыя сердцами, любовию к тебе распаленными. И якоже прежде, тако и ныне подавай помощь твою матернюю всем нам, требующим твоего ходатайства пред Богом. И якоже скорби наша ты сама ведаеши, тако и избавление от них веси. Нам же достойно есть воспевати Бога нашего: Аллилуиа.

По сем глаголется Икос 1 и Кондак 1.

Молитва

О преподобная мати наша Алипие! Излей на нас, бедных, немощных и уничиженных, по неизменному состраданию и милосердию твоему, хотя малую каплю щедрот от Владыки Господа. Приими ны под твое ходатайство и заступление, от всех бед и лютых болезней свободи, согрешениям нашим прощение испроси и воздвигни нас, расслабленных, твоими молитвами.

Не допусти до конца погибнути нам, недостойным рабам Божиим (имена). Буди нам прибежищем и помощию, не остави нас неутешенными, да вси мы прославляем всесвятое имя Отца и Сына и Святаго Духа, ныне и присно и во веки веков. Аминь.

Молитва преподобной матери Алипии

О, великая Церкви Христовой похвало, града Киева стено и утешение, преподобная мати Алипие! К тебе припадаем и тебе молимся: буди предстательница наша ко Христу Богу неусыпная, яко веруем, аще будеши умоляти Человеколюбца Бога, вся будут дарована тебе от моря Его благости. И яко Бог человеколюбив есть, тако и ты, умоляемая нами, грешными, не презри прошения нашего, ибо сами мы по множеству грехов своих не имамы дерзновения.

Твое дело, святая, ходатайствовати о грешных, дело Божие — миловати отчаянных. Испроси, преподобная, коемуждо по его потребе.

В болезнех сущих скоро утеши и исцели, яко и ныне множество исцелений соделоваеши: немыя глаголати, слепыя видети, костьми поврежденныя от одра болезни восставляеши. Вся можеши испросити у Господа, преподобная, аще помолишися к Нему за ны.

Опухоли лютыя не быти соделай. Страждущим от ожогов исцеление скорое подавай, якоже отроку болящему нощию явилася еси, молитве матери его внемлющи. Темже великое чудо исцеления всему миру показала еси.

В тяжкия дни сия торжества беззакония и неправды обиженным и неправедно осужденным, в темницех заключенным, зависти, лжи и корысти ради гонимым, исходатайствуй избавление от клеветы и напасти, яко благодать ходатайствовати за оных сугубо подадеся тебе от Господа.

Супружества благия благослови и соедини. Матерем детородящим подавай благополучное разрешение, сохраняя их и чада от всякаго вреда. Услыши теплую молитву родителей, скорбию о чадех истомленных, да чада их в сознание истины приидут, избегнув сетей лукаваго, и вечное спасение обрящут.

Приими молитвы чад, о родителех своих скорбящих, да молитвами твоими свет Христова Евангелия познают. Такожде утеши безчадных и даруй им плод чрева, да новыя истинныя христианы Господу представят твоим благословением и воспитанием материнским.

Требующим твоея помощи в совершении христианскаго брака посли благословеннаго от Господа спутника жития их, да попечением твоим Христу Богу принесут служение малыя церкви в союзе семейном. Наипаче же подавай мир, тишину и нелицемерную любовь, да будем истиннии ученицы Христовы.

Предавшимся недугам пьянства и наркомании и неимущим силы духа оставити сие душегубительное беззаконие подай силу духа и просвещение ума, якоже явилася еси человеку, от пьянства смерть прияти имущему, и благословением твоим исцелившемуся от недуга сего.

Одиноким и безпомощным низпосли твоими молитвами незримое от Господа утешение и познание истинныя любви Христовой, да уведят, яко друзи наши — святии и ангели — невидимо соблюдают ны.

Прошения неимущих и страждущих приими и подай им своими молитвами нежданное попечение, яко да имут тя благодетельницу в земнем житии своем.

Малодушным, отчаявшимся в житии своем, буди утешительница скорая, якоже спасла еси жену, в скорби погубити себе умыслившую, и отроковицу, в падении с высоты сохраненную от вреда. Темже души их от погибельныя пучины избавила еси.

Такожде молим тя, преподобная: от внезапныя смерти сохрани, якоже отрока невредимо соблюла еси, удар страшный на дорозе приявшаго.

В учении пребывающим излей материнскую помощь и подай прибавление ума, да в нелегком течении учения своего пребывают безпечальны.

В многоразличных житейских делех, бедах и трудностех подавай скорое устроение и благое сих завершение.

Услыши молитвы скорбящих о заблуждающих, кои пребывают вне спасительнаго ковчега Церкве Православныя, да Господь Всеблагий, имиже весть судьбами, спасет их и приведет в познание истины Своея.

Воинам низпосли крепость и силу духа в совершении богоугоднаго служения своего, да сохранит их Господь от всякаго зла.

Монашествующих настави право шествовати путем Господним, укрепляя в подвизех и смиренном несении креста своего, якоже и ты подвизалася во спасение в любви ко Господу и людем Его.

Архиереом и священником подавай истинное стояние в вере православней, да стадо Христово пасут верно и нелицемерно, право правяще слово истины и непреткновенно пред Господом ходяще.

Начальником и властем подай мудрость в управлении народом нашим, да в союзе с Церковию страна наша пребывает в мире и тишине.

Отверзи нам молитвами своими двери милосердия Божия и избави нас от всякаго зла. Даруй нам избежати сетей лукаваго. Моли, преподобная, Милосерднаго Господа о нас, кающихся, да простит нам вины наша по множеству благости Своея.

И даже до конца молитвами твоими сохрани нас неосужденными, да, спасеннии твоим ходатайством и помощию, всегда будем возсылати славу, хвалу, благодарение и поклонение Единому в Троице Богу, Создателю всех, ныне и присно и во веки веков. Аминь.